Admin Admin
المساهمات : 237 تاريخ التسجيل : 04/09/2007
| موضوع: هو منتدى ولا مندبه ؟ .. ما تفهمونا يا بنى ادمين, يا سيدى الأحد أكتوبر 07, 2007 5:08 pm | |
| السلام عليكم
فى شوية حاجات كده تخنق بصراحه
يعنى لو حد عنده مشكله عائليه او خاصه بيه
ينكد علينا معاه
يا سيدى عادى اخوات واصحاب ونستحمل بعض
بس الكلام ده لو بتاخد رأينا او بتطرح مشكلتك كانت تبقى عادى
لكن ده لو حد ابوه ضربه قلم يالهووووووووووووووووووووتى
استلم بقى توبيكات ( قسوة ابى ) ( ليه كده يا عم انت ؟ )
ولو طرده من البيت بقى ( ربنا يخدك بحق جاه النبى ) ( والله لاقول لامى )
ولو واحد بقى اتنفضله او اتطراله او اتكرتن لامؤاخذه يعملها مندبه هنا
يالهوووووووووتى .. يا خرابى يا اختى
وكل ده عشان البت سابته .. شباب خرع
وتوبيكات بقى انما ايه .............. قشطه
( انهن حشرات .. وانا فليت ) ( لو كان بيدى لذبحتها )
ويقعد يكلمنا بالنحوى ويصدعنا واحنا اصلا مش ناقصيين واللى فينا مكفينا وزياده كمان
ولو واحد حبيبها سابها ( انها الحرب ) ( نأخذ من كل رجل قبيلاااااااااااااااااااااااااااااااااااااااااااااااااااااااه )
واحنا نعانى معاها هى كمان .. ما هى ناقصاها بقى
لا وايه .. اسكتى اسكتى دى اسمها ايه ابصر ايه دى المخفيه دى عامله توبيك انما هههههههههههيييييي
وحاجه قلة ادب والله وشغل نميمه وقرف
ولو بقى واحد عنده مشكله
( انا معتصم ) معتصم مين يا عم انت ؟
( اريد حلا ) مفيش حلل تاخد فى كوبايه ؟
ولو واحد عنده اقتراح بقى
تلاقيه فى الردود اللى بتترد عليه بيحلق على الناس
عشان فكرته تفضل بتاعته لوحده
( اوعى يالا ) ( التوبيك ده بتاعى )
وعلى كده حال معظم المنتديات
تقولى ليه اقولك معرفش
تقولى هو انت على طول كده مش عارف حاجه
اقولك اتكلم معايا عدل
ونجرى على الاداره ونشتكى ويبقى حوار
واللى ليه لازمه واللى ملهوش يتدخل وتبقى زيطه
والناس اللى بترد تتخانق مع بعض ( ودينى ما هسيبه ) ( اوعى يا جدع انت )
( لو راجل قابلنى ع الشات ) ( والنبى اللى عنده معزه يلمها يا جماعه )
والمشاكل متتحلش
لسبب
احنا مش عارفين احنا عايزين ايه اصلا
عاوزين نتصالح ؟
ولا عاوزين نتلكك لبعض ؟
...............................................
اخوكم محمد | |
|